අධ්‍යාපන ප්‍රතිසංස්කරණ පිළිබඳව අර්ථවත් විවාදයක් සඳහා අගමැතිවරයා ඉදිරිපත් කළ PowerPoint presentation එක ප්‍රමාණවත් නොවන බව පවසමින්, යෝජිත අධ්‍යාපන ප්‍රතිසංස්කරණ පිළිබඳ ධවල පත්‍රිකාවක් ඉදිරිපත් කරන ලෙස විපක්ෂ නායක සජිත් ප්‍රේමදාස මහතා රජයෙන් ඉල්ලා සිටියේය.
විදුලිබල පනතට සංශෝධන පිළිබඳ නියමිත විවාදය නොපවත්වා, අධ්‍යාපන ප්‍රතිසංස්කරණ යෝජනා කෙරෙහි අවධානය යොමු කිරීමට පාර්ලිමේන්තුවේ කාරක සභාව තීරණය කිරීමෙන් අනතුරුව මෙම ඉල්ලීම සිදු විය.
“ධවල පත්‍රිකාවක් නොමැතිව විවාදයක් පැවැත්වීම ඵලක් නැහැ,” ප්‍රේමදාස මහතා පැවසීය. “ඊයේ අගමැතිතුමා ප්‍රතිසංස්කරණ PowerPoint presentation එකකින් ඉදිරිපත් කළා, එය සුදුසු නැහැ. එවැනි ක්‍රමයක් රටේ අධ්‍යාපන අංශයට සහ නිදහස් අධ්‍යාපන ක්‍රමයට අගෞරවයක්,” ඔහු කියා සිටියේය.
හෙට පැවැත්වීමට අපේක්ෂිත විවාදයට පෙර විධිමත් සාකච්ඡා ලේඛනයක් ඉදිරිපත් කරන ලෙස ඔහු රජයෙන් ඉල්ලා සිටියේය. ආණ්ඩු පක්ෂයේ සහ විපක්ෂයේ සාමාජිකයින්ට අදහස් දැක්වීමට ප්‍රමාණවත් කාලය ලබා දීම සඳහා විවාදය දින තුනක් දක්වා දීර්ඝ කරන ලෙසද ප්‍රේමදාස මහතා ඉල්ලා සිටියේය.
ඊට ප්‍රතිචාර දක්වමින් සභානායක බිමල් රත්නායක මහතා පැවසුවේ මෙම විවාදයෙන් අපේක්ෂා කළේ යෝජිත ප්‍රතිසංස්කරණ පිළිබඳව මහජනතාව දැනුවත් කිරීම බවයි.
“තවමත් අවසන් ලේඛනයක් නොමැති නිසා පුළුල් මහජන සාකච්ඡාවක් අත්‍යවශ්‍යයි,” රත්නායක මහතා පැවසීය. “ප්‍රතිසංස්කරණවල අවසන් කෙටුම්පත සම්පූර්ණ කළ හැක්කේ පුළුල් විවාදයකින් සහ සහභාගීත්වයකින් පසුව පමණයි.”
“ධවල පත්‍රිකා බ්‍රිතාන්‍ය පාර්ලිමේන්තුවේ සම්ප්‍රදායක් ලෙස මුද්‍රණය නොතිබූ කාලයක ආරම්භ වූ දෙයක්,” ඔහු පැවසීය. “අද අපි සිටින්නේ ඩිජිටල් යුගයේ, තොරතුරු PowerPoint presentations හෝ වෙනත් තාක්ෂණික ක්‍රම මගින් බෙදා හැරිය හැකියි. PowerPoint presentation එකක් අපහාසයක් නොවේ,” ඔහු වැඩිදුරටත් පැවසීය.